دی انٹرسیپٹ امریکی نیوز ویب سائٹ نے اپنی خصوصی رپورٹ میں انکشاف کیا ہے کہ پاکستانی حکومت کی ایک خفیہ دستاویز کے مطابق یوکرین پر روسی حملے پر غیرجانبداری کے باعث عمران خان کو وزیر اعظم کے عہدے سے ہٹانے کے لیے امریکی اسٹیٹ ڈپارٹمنٹ نے 7 مارچ 2022 کو پاکستانی حکومت کی حوصلہ افزائی کی یا حکم جاری کیا۔
امریکہ میں پاکستانی سفیر اور محکمہ خارجہ کے دو عہدیداروں کے درمیان ہونے والی یہ ملاقات گزشتہ ڈیڑھ سال سے پاکستان کی سیاست میں شدید اختلافات تنازعات اور قیاس آرائیوں کا موضوع بنی ہوئی ہے، یہ سیاسی افراتفری 5 اگست کو اس وقت مزید بڑھ گئی جب عمران خان کو بدعنوانی کے الزام میں تین سال قید کی سزا سنائی گئی اور ان کو دوسری بار حراست میں لے لیا گیا۔ عمران خان کے وکلا ان الزامات کو بے بنیاد قرار دیتے ہیں۔ اس سزا نے پاکستان کے مقبول ترین سیاست دان عمران خان کو رواں سال ہونے والے پاکستان میں متوقع انتخابات میں حصہ لینے سے بھی روک دیا ہے۔
پاکستانی حکومت کی لیک ہونے والی دستاویز میں امریکی حکام کے ساتھ ملاقات کے ایک ماہ بعد، پارلیمنٹ میں عدم اعتماد کا ووٹ ہوا، جس کے نتیجے میں عمران خان کو اقتدار سے ہٹا دیا گیا۔ خیال کیا جاتا ہے کہ یہ ووٹ پاکستان کی طاقتور فوج کی حمایت سے منعقد کیے گئے تھے۔ اس وقت سے، خان اور اس کے حامی فوج اور اس کے سویلین اتحادیوں کے ساتھ سرگرم اور مصروف ہیں، جن کے بارے میں خان کا دعویٰ ہے کہ اسے امریکی درخواست پر اقتدار سے ہٹانے کا کام کیا گیا۔
پاکستانی کیبل کا متن جو سفیر کی میٹنگ سے تیار کیا گیا تھا اور پاکستان کو منتقل کیا گیا تھا، پہلے شائع نہیں کیا گیا تھا۔ کیبل جسے اندرونی طور پر “سائفر” کے نام سے جانا جاتا ہے، گاجر اور لاٹھی یعنی Stick and carrot کی مثال کو ظاہر کرتی ہے جس میں وعدہ کیا گیا تھا کہ اگر خان کو ہٹا دیا گیا تو گرمجوشی سے تعلقات ہوں گے، اور اگرایسا نہ کیا گیا تودنیا میں الگ تھلگ رہنے کے لیے تیار رہیں ۔
خفیہ دستاویز میں محکمہ خارجہ کے عہدیداروں کے درمیان ہونے والی ملاقات کا بیان شامل ہے، بشمول جنوبی اور وسطی ایشیائی امور کے بیورو کے اسسٹنٹ سیکریٹری آف اسٹیٹ ڈونالڈ لو، اور اسد مجید خان، جو اس وقت پاکستان کے امریکہ میں سفیر تھے۔
یہ دستاویز دی انٹرسیپٹ کو پاکستانی فوج کے ایک گمنام ذریعے نے فراہم کی تھی جس نے کہا تھا کہ ان کا عمران خان یا خان کی پارٹی سے کوئی تعلق نہیں ہے۔
دی انٹرسیپٹ کی طرف سے حاصل کردہ دستاویز کے مواد پاکستانی اخبار ڈان اور دیگر جگہوں کی رپورٹنگ سے مطابقت رکھتے ہیں جس میں میٹنگ کے حالات اور خود کیبل میں تفصیلات کو بیان کیا گیا ہے۔ کیبل میں امریکہ نے یوکرین جنگ پر خان کی خارجہ پالیسی پر اعتراض کیا۔ ان کی برطرفی کے بعد ان عہدوں کو فوری طور پر تبدیل کر دیا گیا، جس کے بعد، ملاقات میں کیے گئے وعدے کے مطابق، امریکہ اور پاکستان کے درمیان گرمجوشی پیدا ہو گئی۔
یہ سفارتی ملاقات یوکرین پر روسی حملے کے دو ہفتے بعد ہوئی، جس کا آغاز اس وقت ہوا جب خان ماسکو جا رہے تھے، اس دورے نے واشنگٹن کو مشتعل کر دیا تھا۔
2 مارچ کو میٹنگ سے چند دن پہلے لو سے یوکرین کے تنازع میں بھارت، سری لنکا اور پاکستان کی غیر جانبداری پر سینیٹ کی خارجہ تعلقات کمیٹی کی سماعت میں سینیٹر کرس وان ہولن کی طرف سے سوال کیا گیا تھا کہ پاکستان نے اقوام متحدہ کی قرارداد سے الگ رہنے کا فیصلہ کیا تھا۔اس کے جواب میں مسٹر لو نے کہا، “وزیراعظم خان نے حال ہی میں ماسکو کا دورہ کیا ہے، اور لہذا مجھے لگتا ہے کہ ہم یہ جاننے کی کوشش کر رہے ہیں کہ اس فیصلے کے بعد وزیر اعظم کے ساتھ خاص طور پر کس طرح ری ایکٹ کرنا ہے۔ وان ہولن اس بات پر ناراض نظر آئے کہ محکمہ خارجہ کے اہلکار اس معاملے کے بارے میں عمران خان سے بات چیت میں نہیں تھے۔
اجلاس سے ایک دن پہلے عمران خان نے اپنے یوکرین کے مسئلے پر ایک ریلی سے خطاب کیا براہ راست جواب دیا۔ “کیا ہم تمہارے غلام ہیں؟ “آپ کا ہمارے بارے میں کیا خیال ہے؟ کہ ہم آپ کے غلام ہیں اور آپ ہم سے جو کہیں گے ہم کریں گے؟عمران خان نے مزید کہا کہ “ہم روس کے دوست ہیں، اور ہم امریکہ کے بھی دوست ہیں۔ ہم چین اور یورپ کے دوست ہیں۔ ہم کسی اتحاد کا حصہ نہیں ہیں۔ عمران خان کی گرج دار آواز والا یہ جملہ بہت معروف ہوگیا۔
دستاویز کے مطابق ملاقات میں لو نے واضح الفاظ میں تنازع میں پاکستان کے موقف سے واشنگٹن کی ناراضگی کے بارے میں بات کی۔ دستاویز میں لو کا حوالہ دیتے ہوئے کہا گیا ہے کہ ’’یہاں اور یورپ میں لوگ اس بات پر کافی فکر مند ہیں کہ اگر ایسا کوئی مؤقف ممکن بھی ہے تو پاکستان (یوکرین پر) اس قدر جارحانہ طور پر غیر جانبدارانہ موقف کیوں اختیار کر رہا ہے۔ یہ ہمارے لیے اتنا غیر جانبدارانہ موقف نہیں لگتا۔” لو نے مزید کہا کہ انہوں نے امریکی قومی سلامتی کونسل کے ساتھ اندرونی بات چیت کی ہے اور یہ کہ “یہ بالکل واضح لگتا ہے کہ یہ وزیر اعظم کی پالیسی ہے۔”
اس کے بعد لو نے ٹھوک بجا کر کہا کہ “میرے خیال میں اگر وزیر اعظم کے خلاف عدم اعتماد کا ووٹ کامیاب ہو جاتا ہے تو واشنگٹن میں سب کو معاف کر دیا جائے گا کیونکہ روس کے دورے کو وزیر اعظم کے ذاتی فیصلے کے طور پر دیکھا جا رہا ہے،” دستاویز کے مطابق لو نے دھمکی آمیز انداز اپناتے ہوئے کہا کہ: “ورنہ۔۔۔”مجھے لگتا ہے کہ آگے جانا مشکل ہو گا۔”
لو نے خبردار کیا کہ اگر صورتحال کو حل نہ کیا گیا تو پاکستان کو اس کے مغربی اتحادیوں کے ہاتھوں پسماندہ کر دیا جائے گا۔ لو نے کہا، “میں یہ نہیں بتا سکتا کہ یورپ اسے کس طرح دیکھے گا لیکن مجھے شبہ ہے کہ ان کا ردعمل ایک جیسا ہو گا،” لو نے مزید کہا کہ اگر خان اپنے عہدے پر رہتے ہیں تو انہیں یورپ اور امریکہ کی طرف سے “تنہائی” کا سامنا کرنا پڑ سکتا ہے۔
پاکستانی کیبل میں ڈونلڈ لو کے اقتباسات کے بارے میں پوچھے جانے پر، اسٹیٹ ڈپارٹمنٹ کے ترجمان میتھیو ملر نے کہا “ان مبینہ تبصروں میں کچھ بھی یہ نہیں جس میں دکھایا گیا ہے کہ امریکہ کے مطابق پاکستان کا لیڈر کون سا ہونا چاہیے۔” ملر نے کہا کہ وہ نجی سفارتی بات چیت پر تبصرہ نہیں کریں گے۔
پاکستانی سفیر نے امریکی قیادت کی طرف سے عدم توجہ پر مایوسی کا اظہار کرتے ہوئے جواب دیا: “اس ہچکچاہٹ نے پاکستان میں یہ تاثر پیدا کر دیا تھا کہ ہمیں نظر انداز کیا جا رہا ہے یا یہاں تک کہ ہمیں قدر کی نگاہ سے دیکھا جا رہا ہے
دستاویز کے مطابق، بحث کا اختتام پاکستانی سفیر نے اس امید کا اظہار کرتے ہوئے کیا کہ روس-یوکرین جنگ کا مسئلہ “ہمارے دو طرفہ تعلقات کو متاثر نہیں کرے گا۔” لو نے اسے بتایا کہ نقصان حقیقی تھا لیکن مہلک نہیں، اور خان کے جانے کے بعد، تعلقات معمول پر آسکتے ہیں۔ “میں بحث کروں گا کہ اس نے ہمارے نقطہ نظر سے تعلقات میں پہلے سے ہی خرابی پیدا کر دیے ہیں، لو نے پاکستان میں “سیاسی صورتحال” کو دوبارہ اٹھاتے ہوئے کہا۔ “آئیے چند دن انتظار کریں کہ آیا سیاسی حالات بدلتے ہیں، جس کا مطلب یہ ہوگا کہ اس معاملے پر ہمارا کوئی بڑا اختلاف نہیں ہوگا اور یہ دھند بہت جلد دور ہوجائے گی۔ دوسری صورت میں، ہمیں اس مسئلے کا سامنا کرنا پڑے گا اور فیصلہ کرنا پڑے گا کہ اسے کس طرح منظم کرنا ہے.
اجلاس کے اگلے دن، 8 مارچ کو، پارلیمنٹ میں خان کے مخالفین عدم اعتماد کے ووٹ کی طرف ایک اہم طریقہ کار کے ساتھ آگے بڑھے اور یہ تحریک کامیاب ہو گئی۔
مڈل ایسٹ انسٹی ٹیوٹ کے ایک نان ریذیڈنٹ اسکالر اور پاکستان کے ماہر عارف رفیق نے کہا، “اس ملاقات کے وقت خان کی قسمت پر مہر نہیں لگائی گئی تھی، لیکن یہ کمزور ہوگئی تھی۔” “بائیڈن انتظامیہ جانتی تھی کہ جو پاکستان میں اصل اقتدار کے مالک ہیں ۔ ان کو اشارہ دیا جارہا ہے کہ وہ اگر اس حکومت کو نہیں بدلتے تو نتائج سے باخبر رہیں
انٹرسیپٹ نے دستاویز کی تصدیق کے لیے وسیع پیمانے پر کوششیں کی ہیں۔ پاکستان میں سیکورٹی کے ماحول کو دیکھتے ہوئے پاکستانی حکومت کے ذرائع سے آزادانہ تصدیق ممکن نہیں تھی۔ واشنگٹن ڈی سی میں پاکستانی سفارت خانے نے تبصرہ کرنے کی درخواست کا جواب نہیں دیا۔
محکمہ خارجہ کے ترجمان ملر نے کہا کہ ہم نے یوکرین پر روس کے حملے کے دن اس وقت کے وزیر اعظم خان کے ماسکو کے دورے پر تشویش کا اظہار کیا تھا اور اس مخالفت کو عوامی اور نجی طور پر بتایا تھا۔ ان کا مزید کہنا تھا کہ “امریکہ کی جانب سے پاکستان کی قیادت کے بارے میں اندرونی فیصلوں میں مداخلت کے الزامات غلط ہیں۔ ایسے الزامات ہمیشہ جھوٹے رہے ہیں اور اب بھی یہ الزام جھوٹا ہے۔
