اطلاعات کے مطابق اسرائیلی فوج کی جانب سے غزہ میں متوقع زمینی کارروائی سے قبل غزہ میں سروسزغیر فعال کرنے کی درخواست کی گئی تھی۔
متعدد میڈیا رپورٹس کے مطابق، گوگل میپس، ویز اور ایپل میپس اب اسرائیل اور غزہ کے لیے لائیو ٹریفک اپ ڈیٹ نہیں دکھا رہے ہیں۔ یہ اقدام اسرائیلی ڈیفنس فورسز (IDF) کی طرف سے فلسطینی سرزمین پر متوقع حملے سے قبل سامنے آیا ہے۔
گوگل کے ترجمان نے بلومبرگ کو بتایا، “جیسا کہ ہم نے پہلے تنازعات کے حالات میں کیا ہے اور خطے میں بدلتی ہوئی صورت حال کے جواب میں، ہم نے مقامی کمیونٹیز کی حفاظت کے پیش نظر ٹریفک کے لائیو حالات اور کاروباری معلومات کو دیکھنے کی صلاحیت کو عارضی طور پر غیر فعال کر دیا ہے۔
انہوں نے نوٹ کیا کہ ریئل ٹائم ٹریفک ڈیٹا کو آف کر دیا گیا ہے، لیکن صارفین اب بھی نیویگیشن سسٹم استعمال کر سکتے ہیں اور پھر بھی آمد کے متوقع اوقات دیکھ سکیں گے، جو کہ لائیو حالات پر مبنی ہوں گے۔
صورتحال کا علم رکھنے والے ایک اور ذریعے نے بلومبرگ کو بتایا کہ گوگل کی جانب سے اسرائیل اور غزہ میں ریئل ٹائم کراؤڈنگ ڈیٹا کو ہٹانا IDF کی درخواست پر کیا گیا تھا، کیونکہ اس طرح کی معلومات ممکنہ طور پر اسرائیلی فوجیوں کی نقل و حرکت کو ظاہر کر سکتی ہیں۔
اس سے قبل، گوگل نے بھی ایسا ہی اقدام کیا تھا جب اس نے 2022 میں روس کے فوجی آپریشن کے آغاز کے بعد یوکرین میں گوگل میپس پر لائیو ٹریفک ڈیٹا کو غیر فعال کر دیا تھا۔ اس وقت کمپنی کا کہنا تھا کہ اس نے یہ فیصلہ یوکرین کے حکام سے مشاورت کے بعد کیا ہے۔
اسرائیلی ٹیک آؤٹ لیٹ گیک ٹائم کے مطابق، ایسا لگتا ہے کہ ایپل نے پیر کے روز IDF کی درخواست پر عمل کرنا شروع کر دیا ہے، صارفین Apple Maps پر لائیو ٹریفک رپورٹس دیکھنے سے قاصر ہیں۔
