یہ ایران کی فوج کی ایرو اسپیس ڈویژن کی جانب سے جاسوسی سیٹلائٹ کا تیسرا کامیاب لانچ ہے۔
ایران کے اسلامی انقلابی گارڈ کور (IRGC) نے حکام کے مطابق، ایک تیسرا سیٹلائٹ بھی کامیابی کے ساتھ مدار میں بھیج دیا ہے۔
بدھ کے روز دو اہلکاروں نے تصدیق کی کہ ایلیٹ ملٹری فورس کے ایرو اسپیس ڈویژن نے امیجنگ سیٹلائٹ نور کے تیسرے ورژن کومدار میں ڈال دیا ہے، نور کا فارسی میں مطلب ہے “روشنی”۔
نور-3 کو مبینہ طور پر زمین کی سطح سے 450 کلومیٹر (280 میل) کے مدار میں رکھا گیا ہے، اور اسے اپنے پیشروؤں کی طرح IRGC کی طرف سے تیار کردہ قاصد – یعنی “میسنجر” – کیریئر کا استعمال کرتے ہوئے خلا میں لے جایا گیا تھا۔
مغربی حکام نے بدھ کے روز اس لانچ پر فوری طور پر کوئی تبصرہ نہیں کیا۔
نور کا پہلا ورژن اپریل 2020 میں زمین کے اوپر 425 کلومیٹر (265 میل) کے مدار میں کامیابی کے ساتھ لانچ کیا گیا تھا۔ یہ کئی ناکام کوششوں کے بعد ایران کی طرف سے لانچ کیا جانے والا پہلا فوجی جاسوسی سیٹلائٹ بن گیاتھا۔
دوسرا ورژن 2022 کے اوائل میں مکسڈ فیول کیریئر کا استعمال کرتے ہوئے 500 کلومیٹر (310 میل) کے کم مدار تک پہنچا۔
مغرب کی تنقید کے باوجود، ایرانی حکام نے سیٹلائٹ پروگرام میں توسیع کا وعدہ کیا ہے اور توقع ہے کہ مستقبل قریب میں مزید کئی سیٹلائٹ مختلف مداروں میں بھیجیں جائیں گے۔
اگست 2022 میں، ایک ایرانی ملکیتی اور روسی ساختہ سیٹلائٹ – جس کے بارے میں کہا جاتا ہے کہ وہ ہائی ریزولوشن تصاویر لینے کے قابل ہے – کو قازقستان کے ایک اڈے سے کامیابی کے ساتھ لانچ کیا گیا تھا۔
مغربی اتحادیوں کا ماننا ہے کہ ایرانی سیٹلائٹس کی ترقی اقوام متحدہ کی سلامتی کونسل کی قرارداد کی خلاف ورزی کر سکتی ہے جس میں عالمی طاقتوں کے ساتھ ملک کے 2015 کے جوہری معاہدے کی حمایت کی گئی ہے کیونکہ اس ٹیکنالوجی کو ممکنہ طور پر جوہری ہتھیاروں کی سہولت کے لیے استعمال کیا جا سکتا ہے۔
ایران نے بارہا ایسے دعوؤں کو مسترد کرتے ہوئے کہا ہے کہ اس کا جوہری پروگرام مکمل طور پر پرامن ہے۔
جوہری معاہدہ، جسے باضابطہ طور پر جوائنٹ کمپری ہینسو پلان آف ایکشن (JCPOA) کے نام سے جانا جاتا ہے، 2018 میں امریکہ کے یکطرفہ طور پر اس سے دستبردار ہونے اور ایران پر دوبارہ سخت پابندیاں عائد کرنے کے بعد اب بھی تعطل کا شکار ہے۔
ایرانی حکام نے حال ہی میں ایک بار پھر تجویز پیش کی ہے کہ وہ معاہدے پر واپس آنے کے لیے تیار ہیں لیکن اس کے لیے پہلے مغربی فریقوں کے سیاسی عزم کو دیکھنا ہوگا، جن میں فرانس، جرمنی اور برطانیہ بھی شامل ہیں۔
معاہدے کی ایک شق کے حصے کے طور پر، ایران کے بیلسٹک میزائلوں کی تیاری پر عائد کئی پابندیاں اگلے ماہ خود بخود ہٹا دی جائیں گی۔لیکن ایرانی جوہری پروگرام پر کشیدگی اور مغربی الزامات کے ساتھ کہ ایران نے روس کو یوکرین میں جنگ کے لیے ڈرون سے مسلح کیا ہے، یورپی طاقتوں نے کہا ہے کہ وہ اس شق کے باوجود ایران پر اپنی پابندیاں برقرار رکھیں گے۔
